Singapore  

Sociolinguistic Observations
on its Society and Languages (2/2)

新加坡e社會語言學觀察 [ 漢羅台語版]

by Wi-vun Taiffalo Chiung (蔣為文)

[Romanized Taiwanese Version]

新加坡 6/26/2000

今仔日是第九屆「International Conference on Chinese Linguistics」e5 第一日。這個會beh開三工。今年是National University of Singapore所主辦。這個會主要是做漢語e5 研究，包含華語、廣東話、福建話、客話等。多數猶是以華語(Mandarin)為主，而且chiaN5 che7 來e5學者攏是傳統漢語聲韻學e5 研究者。In e5 興趣m7是推「古音」to7 是做「方言」e5 比較研究。

這擺發表e5 論文有196篇。大概有beh kah 300人來參加。有ui3 台灣、香港、中國、Ma-lai-se-a (Malaysia)、日本、法國、美國kap新加坡等等e5 國家。台灣來e5 就我所知，有黃美金、鄧守信、董忠司、姚榮松、何三本、kap新竹師院台灣語文所、清華語言所、台大語言所等e5 學生。這幾年台灣e5 語言學e5 學生ti7 發表會方面真積極。舊年ti7 美國舉辦e5 Sino-Tibetan conference，我ma7 有tu2 著政大kap 清華e5 學生。Ti7德州San Antonia舉辦e5 西南語言學會(LASSO)ma7 tu2 著一個台大來e5 學生。

這koa2台灣來e5學生，特別是新竹師院e5，攏真pi3-su2 ，ma7真客氣。In上臺e5時攏be7輸teh 向老師做學期報告按呢。In攏會講「Tak8家好，我是台灣e5 新竹師院e5 研究生，請各位師長多多指教」(用華語講e5 )。In hou7 我e5 感覺是in對家ti7 e5信心無啥夠。清華、台大來e5 hit 幾個學生e5 情形khah好稍寡。

總是，我感覺這幾個學生來chia，淡薄仔是應付應付nia5。Khah好小khoa2 e5 hit幾個ma7只是想beh參加conference e5記錄，thang好未來chhoe7頭路khah方便。Hit幾個做台語研究e5學生，我看be7出in對台語有啥熱情。Kan-taN其中一個，伊本身是因為先接觸台語文(伊知影台文通訊)才去考師院e5台語所，有khah大e5熱情。

我幾擺想beh接觸一koa2學生，講koa2台語或者是語言學e5代誌，m7-koh in冷淡e5反應，hou7 我真失望。

這個研討會雖然是「international」，m7-koh主要使用e5 語言猶是華語。部份西方來e5 學者用英語。

正式發表以外e5場合，加減會聽著香港人講廣東話，kan-taN罕leh聽著台灣人講台語。這個會m7-taN是講華語，氣氛ma7真中國氣。不而過，我be7受氣，因為che本來to7是in中國e5 「Chinese Linguistics」e5研討會。台灣人未來猶是有需要家ti7 e5 International Conference on Taiwanese Linguistics。台灣雖然bat辦過幾擺台灣語言e5國際研討會，m7-koh攏無tak8冬繼續辦。而且真可惜e5是bat發生過禁止用台語發言e5事件。

中晝食飯e5時，ham黃美金仝桌。伊知影我ui3 台灣來，當teh ti7美國讀語言學了，ma7真積極theh8 一份台灣語言學會e5通訊hou7我，招我來參加。伊ma7提起講in有一個project當teh做。He是有關東亞kap東南亞e5語言政策e5比較研究。總是，伊對少年輩e5語言學家e5關心，hou7 我感覺真意外。

暗時ti7「福祿壽」大樓附近seh8 。Hia有幾間仔唱片行。內底攏有一koa2 台語歌。其中一間koh有台灣e5歌仔戲e5 VCD。親像Ho7-lo2 歌仔戲團e5 天鵝宴，葉青kap楊麗花等e5 歌仔戲等。另外有一間一直teh pang3 「福建話」e5 伴唱帶，親像安童哥買菜等。Hit te3帶內底唱e5，會使講 kap台灣e5 腔口差不多。我頭仔叫是he是台灣進口來e5。問頭家了才知hit個歌星是Malaysia e5人。

新加坡e5福建話，基本上我猶聽有。Hit個感覺to7 na2台灣70歲以上e5人teh講台語按呢。新加坡e5 福建話kap台語e5差別，我無特別收集資料做比較，所以無法度講詳細。不而過，初步聽著無仝e5，有年代e5唸法。比如，1997年，in會唸「it kau2 kau2 chhit」。

來新加坡進前，叫是chia有真che7人會曉講福建話，結果我來chia ka7試探，才發現已經無hiah che7人會曉講福建話ah。根據我初步e5觀察，主要是中年人以上，kap khah下腳層e5人加減仔有teh講。Ti7 福祿壽附近踏三輪車，或者賣水果e5 ，加減有聽in teh講。福建話、廣東話、潮州話等，ti7新加坡攏hong5當做是「方言」。新加坡政府推動講華語運動，目的主要to7是beh hit koa2講無仝語言e5人放棄原來e5母語認同，改認「華語」做新e5「母語」。  

新加坡e5 教育是雙語教育。主要是英語kap 家ti7族群e5母語。福建話、廣東話、Hakfa等一koa2 語言無包含ti7學校教育內底。Che是因為講hit koa2 語言e5人已經hou7新加坡政府強迫接受「華語」做新e5母語認同ah。所以「華人」ti7 學校kan-taN會使選「華語」做母語。Chi-mai2大部份e5新加坡華人攏會曉講華語ah。新加坡e5華語ham中國e5 北京話比起來，khah接近台灣。In ma7 khah無捲舌，腔口ham台北華語差不多。最近定聽著無仝e5腔口是「研究」，新加坡人攏講「yan2 jiu1」(ti7台灣是讀「yan2 jiu2」)。其他e5差別，主要是語詞e5無仝。比如，「乘客」in講「搭客」。除了語詞e5 差別，文字ma7有差。漢字ti7新加坡主要是採用中國e5簡體字。

在我看，新加坡推sak「華語運動」會成功，有兩個因素。也to7是，內部因素kap外部因素。內部因素主要是利用「華語」結合華人e5認同，ti7新加坡e5 族群矛盾內底佔領政治kap 經濟e5資源。外在因素是有以華語做國語e5 中國做後盾。中國對新加坡e5 華人來講，是in阿公阿媽e5故鄉；而且中國對新加坡無直接e5威脅(因為中國從來m7 bat講新加坡是中國e5 一部份)；加上中國這幾年e5經濟tauh-tauh-a好起來，學華語有實質上做生理e5好處。

新加坡 6/27/2000

今仔日是研討會e5第二工。今仔日問著在地人，才知開會e5附近有一間日本人投資e5 冊店「Kinokuniya 紀伊國屋」。

Kinokuniya是ti7 Ngee Ann City (義安城大樓)內底。不止仔大間，冊ma7真che7。比進前看e5 大眾冊店加真好，ma7加真che7人文方面e5冊。

Kinokuniya 內底大概有7成是英文冊，2成khah加是日本冊，chhun e5無kah 1成e5 中文冊。中文冊內底，大部份(我ioh有9成以上)是台灣進口來e5。中文冊內底，大部份是khah中國氣e5，少數是有台灣味e5。台灣味e5冊，有khoaiN3有關賴和e5冊，玉山出版社出e5「阿媽e5故事」，kap鄭良偉教授出e5 hit 4本台語研究e5冊。Khah可惜e5是無khoaiN3台語文學e5作品。台文e5作品若會使推sak到台灣以外e5 所在，會tang3增加台灣文化ti7世界e5影響kap能見度。透過文字e5無仝，ma7 thang hou7 世界e5人知影台灣ham中國e5基本差異。

暗頓是大會安排e5 宴會。菜色真chheN-chhau。Hit暗ham姚榮松、董忠司、竺(tiok)家寧等人坐仝桌。我ham姚榮松開講一koa2越南研究e5代誌。董忠司有向我提起台灣語文學會，問我看beh參加無。這擺新竹師院e5 學生來幾a7個(聽講是8個)，看會出董忠司教授ti7這方面e5用心。

Beh暗仔ti7 MRT(Mass Rapid Trans) e5入口有阿婆仔teh賣報紙。我ka7 買2份中文報紙，伊ka7 我講「khou ji7」($1.2)。

暗時坐MRT轉來，經過福祿壽 e5時，發現邊仔e5巷仔lin3有一陣人kheh ti7 hia m7知teh 看啥。我oa2過ka7看， 原來是有歌星teh駐唱e5露天餐廳。我去hit陣當teh唱蔡秋鳳hit首「金包銀」。Soah來ma7 koh有幾a7首台語歌，親像「心事啥人知」、「愛情e5騙子」。除了有台語歌ma7有華語歌 、泰國kap廣東歌。Ti7 hia，khia7 ti7餐廳外位聽免錢e5人比實際納錢入去餐廳坐e5人客khah che7。Hia e5聽眾，我感覺起來大部份是下腳階層e5。

福祿壽hia有三輪車e5集合場。就我e5觀察，有be7少三輪車夫會曉講福建話。

新加坡 6/28/2000

     今仔日是我發表論文e5時間。我e5標題是「漢字對語詞認知e5影響」。He是ui3 cognition e5角度來批判「有音to7有字」e5講法。可惜我hit 場e5聽眾無到10人。看會出參加這個研討會e5人對cognition e5研究無啥興趣。

     Chang聽收音機e5時，總算hou7我聽著有福建話e5放送ah。不過，kang-taN 3分鐘nia5。He是ti7 FM958 e5新聞短報聽著e5。

     新加坡e5廣播差不多一半以上e5節目是講英語e5，chhun e5是其他e5語言。

新加坡 6/29/2000

     今仔日去 National Library kap聖經公會chhoe7看有白話字e5資料無。

     National Library內底e5電腦顯示hia有幾a7本有關白話字e5冊。我tui3 電腦內底揀2本請圖書館員幫我tiau3冊出來。結果kan-naN其中e5 一本chhoe7 有nia5。Hit本是「The Hokkien Vernacular. English Text with English Notes and Chinese Romanised Version」。He是 G.T. Hare，C.M.G.，C.I.S.O所編輯，1904年ti7 Kuala Lumpur所出版e5。Hit本冊內底白話字e5 符號kap拼音法ham Barclay牧師所發行e5台灣府城報差不多。Kan-taN有小khoa2 e5差別，比如講「o^.」ti7 Hokkien Vernacular內底是寫「 」；「hian」是拼做「hien」。另外，這本冊內底e5課文攏無標聲調。其中有一段寫著台灣講「台灣是東南方e5海嶼，四邊是海，內面e5山嶺真tsoe7[1]，亦koaiN5 koh大」。

     這本冊真舊ah (冊皮是紅色e5)，圖書館員吩咐我be7使影印，若beh to7 ai3 ui3 microfilm印出來。Ti7 National Library，一般影印只要5 cent nia5，結果ui3 microfilm印，一份ai3 50 cent，實在貴死。

     National Library e5邊仔附近是新加坡聖經公會。內底有賣台灣進口來e5 Hakfa kap台語e5聖經。我問店員講in kam有新加坡ka-ti7翻e5 Hakfa kap福建話e5聖經。伊講無。

     暗時ti7 toa3 e5 hostel e5客廳hia寫筆記。邊仔有幾個韓國來e5遊客，年紀大概攏20 thong2。我感覺日本ham韓國e5 少年人出國自助旅行e5風氣比台灣e5少年人加真om7 。不時ti7 hostel攏會tu2著日本ham韓國e5 少年人，偏偏真罕leh tu2著台灣e5少年家。像我1998年ti7越南學越南話e5時，kan-taN tu2著日本ham 韓國人，to7無tu2著台灣e5少年仔。

[6/24-25 e 日記]

新加坡e報紙

The Hokkien Vernacular. English Text with English Notes and Chinese Romanised Version

無標聲調e白話字寫法