|
|
3.2.
影響白話字發展e政治社會因素
Ui讀寫能力e角度來看，白話字會ti早期e台灣發展起來，並毋是意外e代誌。白話字利用kui個有限e羅馬字母就esai描寫所有e台語詞，伊e效率性實在毋是hit kui萬字e漢字會當相比評e。Ti古早農業社會e台灣，大部分e做穡人平時做穡to做be-liau-a，那有時間thang去學寫漢字。白話字e出現tu-ho乎即寡下腳層e做穡人ti真短e時間內就學會曉讀kap寫。蔡培火ti 20年代e時就點出漢字對濟濟e台灣人來講是學習上e負擔；伊進一步主張用白話字來thau放青瞑牛，乎khah濟人會曉讀kap寫thang增加知識、學問。伊ti 1925年出版e用白話字寫e《十項管見》lai-te講：
雖然白話字比漢字khah有效率，一般人soah顛倒ka看輕、當做低路e文字[1]，致使白話字ti教會以外e社區並無hong真普遍e接受kap使用。會造成即個現象，主要是因為下面即3個原因。 第一，「漢字主宰」e社會化e結果。漢字ti漢字文化圈lai-te kui千年來long hong採用作正式e官方文字。這無形中影響著老百姓對漢字e看法，認為有讀冊、有學問、beh做官e就ai會曉讀寫漢字。漢字以外e文字long是khah低路、無水準e人teh學e。Ti 19世紀尾e時巴克禮牧師就指出一般民眾看重漢字、看無白話字e即個現象。伊ti 1885年發行e頭一期e「台灣府城教會報」內底寫講：
第二，對漢字e結構kap功能有誤解，soah來認為漢字有“表意”e功能、上etang表達漢語。因為真濟人有即種無正確e觀念，soah認為無用漢字就無法度來完整、正確e表達in e口語。毋過，愈來愈濟e研究，包括研究東亞語言出名e Hawaii大學教授DeFrancis已經指這種觀念是m tioh e。咱ti後一節會詳細討論為啥物即種看法是無正確e。 第三，政治力干涉e結果。羅馬字e使用受政治力壓迫e現象ti中國國民黨統治台灣e時期特別明顯。「漢字」對中國國民黨政權來講是中國文化e象徵之一，用漢字以外e文字來書寫漢語等於是向大中國e政治、文化概念挑戰。所以中國國民黨bat用鴨霸e手段禁止白話字e使用，像講ti 1975年下令沒收白話字版e《新約》。[2] [1] 指英文lai-te e “digraphia”。有關digraphia，esai參考DeFrancis 1984，Dale 1980，Tiun 1998。 [2] 有關政治kap台灣語言e論述，esai參閱黃1993，施1996。
|